Presentación

O EEDG (Estudo da economía do deseño en Galicia) é un proxecto de investigación levado a cabo pola DAG (Asociación Galega de Deseño) e financiado por GAIN (Axencia Galega de Innovación) sobre o impacto e o retorno do sector do deseño na economía galega. Este estudo, a partir do traballo de campo cuantitativo e cualitativo realizado, busca coñecer a realidade e a dimensión do sector, así como analizar o seu potencial como motor de cambio e transformación. Para isto leváronse a cabo enquisas e entrevista tanto a profesionais e empresas de deseño como a empresas de diferentes sectores produtivos.

Nesta primeira fase de actuación implicouse a empresas que forman parte dos 15 clústeres de Galicia, e a empresas que estiveron involucradas nas diferentes iniciativas e programas relacionados co deseño e a innovación levados a cabo pola axencia Galega de Innovación (GAIN), a Axencia Galega de Industriais Forestais (XERA) ou o Instituto Galego de Promoción Económica (IGAPE).

127

respostas

Enquisa a empresas

258

respostas

Enquisa profesionais do deseño

Entrevistas a empresas

Entrevistas a profesionais do deseño

Obxectivos

Obxectivos específicos do estudo en empresas de diferentes sectores económicos:

Saber que consideración teñen do deseño as empresas galegas e o nivel de «uso» que se lle da á disciplina.
Saber se as empresas invisten en deseño de forma habitual, canto invisten, se calculan o retorno dese investimento e en que aspectos o aplican.
Valorar ata que punto as empresas consideran o deseño nas súas estratexias empresariais.
Identificar o perfil dos e das profesionais do deseño que se integran nas estruturas internas das empresas e aqueles e aquelas que se contratan de maneira externa.

Obxectivos específicos do estudo en empresas e profesionais do deseño:

Ter datos obxectivos da prestación de servizos de deseño en Galicia, sendo unha aproximación ao que podería ser a oferta de servizos especializados.
Ofrecer datos cuantitativos que permitan establecer comparativas con estudos similares e tamén definir un punto de partida para futuros estudos deste tipo en Galicia.
Realizar unha análise comparativa entre profesionais por conta propia e allea como referencia para entender mellor as diferentes realidades e vías que existen á hora de exercer como profesional do deseño.

Conclusións xerais

Se se deixasen de facer actividades de deseño estímase que a produción da economía galega podería caer case 2.000 millóns de euros en valor engadido e se perderían máis de 42.000 empregos equivalentes a tempo completo.

O deseño debe considerarse clave en calquera das políticas e programas para a recuperación da economía galega. Hai que ter en conta que os servizos de deseño son necesarios para que as empresas poidan medrar e competir.

As empresas precisan indicadores que lles permitan entender o potencial que ten o deseño como ferramenta aplicada ás súas necesidades; mais tamén demandan ferramentas para saber como contratar e medir o deseño.

É necesario incidir na formación e apoio ás empresas para aportarlles os coñecementos necesarios sobre as vantaxes do uso do deseño.

Para mellorar a comunicación entre o sector do deseño e as empresas é importante traballar a taxonomía de conceptos, especialidades, funcións e roles do deseño e saber transmitila.

Estudos coma este e ferramentas de localización como o Mapa de Provedores de Servizos de Deseño, poden servir para facilitar ás empresas a contratación de servizos e traballadores.

O deseño é un sector resistente ante as situacións de crise, capaz de desenvolver solucións creativas e de futuro dirixidas ao resto dos sectores.